ശനിയാഴ്‌ച, ജനുവരി 18, 2014

യു. എ. ഇ. സൌഹൃദപ്പന്തല്‍


യു.എ.ഇ. സൗഹൃദപ്പന്തൽ
====================
17-01-2014 വെള്ളിയാഴ്ച ദുബായിലെ ടുലിപ്-ഇൻ ൽ ചേർന്ന സംഗമം.

ഓൺലൈൻ രംഗത്തെ വിവിധ ഫെയ്സ്-ബുക്ക് കൂട്ടായ്മകളിലെ സുഹൃത്തുക്കൾ ഒർത്തുചേർന്നത് സന്തോഷകരമായ അനുഭവമായിരുന്നു. സാഹിത്യ സാംസ്കാരിക കലാരംഗങ്ങളിൽ കഴിവ് തെളിയിച്ചവരുടെ ഒത്തുചേരൽ പരസ്പരം അറിയാനും അടുത്തിടപഴകാനും ഒരോരുത്തരുടെയും പ്രവർത്തനങ്ങളെ പ്രോത്സാഹിപ്പിക്കുവാനും കൂടുതൽ ദൃഡമായ സൗഹൃദബന്ധങ്ങൾ സ്ഥാപിക്കാനും ഇടയാക്കുന്നതായിരുന്നു.

സന്നിഹിതരായവർ സ്വയം പരിചയപ്പെടുത്തിയപ്പോൾ ഓരോരുത്തരെയും കൂടുതൽ മനസ്സിലാക്കുന്നതിനുള്ള തുടക്കമായി.. ചിത്രങ്ങളിൽ നിന്നും യഥാർത്ഥത്തിലേക്കുള്ള ഉയിർത്തെഴുന്നേൽപ്പ് മനസ്സിലെ ചിത്രമായി ഇടം നേടുന്ന അനുഭവമാണ്‌.

ഉൽഘാടകനായ ശ്രീമാൻ. അബ്ദുൽലത്തീഫ് സാഹിബിന്റെ ചെറു പ്രസംഗം ഓൺലൈൻ മാദ്ധ്യമരംഗത്തെ സംബന്ധിച്ചും സാഹിത്യരചനകളെ സംബന്ധിച്ചും പ്രത്യേകിച്ച് കവിതകളെ സംബന്ധിച്ചും ഉൾക്കാഴ്ച നൽകുന്നതായിരുന്നു.

പ്രശസ്തരായ 5 ചിത്രകാരന്മാരുടെ ചിത്രപ്രദർശനം മനോഹരമായിരുന്നു.  എല്ലാവരും ഒന്നിനൊന്ന് മികച്ച ചിത്രകാരന്മാർ തന്നെ.  അവർക്ക് അഭിനന്ദനങ്ങൾ .

കവിതകൾ അവതരിപ്പിച്ചും  പാട്ട് പാടിയും മിമിക്രി അവതരിപ്പിച്ചും സംഗമം അടിപൊളിയാക്കുന്നതിൽ എല്ലാവരും സഹകരിച്ചു.  പ്രത്യേകിച്ച് ദിലീപ് ദിഗന്ദനാഥൻ അവതരിപ്പിച്ച കവിത ചൊൽപ്പാട്ട് എല്ലാവരെയും ഒരുപോലെ ആനന്ദിപ്പിച്ചു. സജയ് കുപ്ലേരിയുടെ ഗാനാലാപനം മനോഹരമായിരുന്നു.  കലാഭവൻ ഹമീദ് അവതരിപ്പിച്ച മിമിക്രിയും രസകരമായിരുന്നു.

ഓൺലൈൻ സൗഹൃദങ്ങളെ ഒരു പന്തലിലെത്തിച്ച അണിയറ പ്രവർത്തനം കൂടുതൽ പ്രയോജനകരമായ, സേവന തല്പരതയിലേക്ക് പ്രവേശിക്കുന്നതിന്നാവശ്യമായ, ഒരു നേതൃനിരയുണ്ടാക്കിയത് വളരെ ശ്ലാഘനീയമായ കാര്യമാണ്‌.

സർവ്വോപരി ഇങ്ങനെയൊരു സൗഹൃദപ്പന്തലിന്റെ അണിയറ ശില്പികളെ അനുമോദിക്കുന്നു. അവരുടെ ഇനിയങ്ങോട്ടുള്ള പ്രവർത്തനങ്ങൾക്ക് സാധ്യമായ സഹായ സഹകരണങ്ങൾ എല്ലാവരിൽ നിന്നും ആവശ്യമായിട്ടുണ്ട്.  അതുണ്ടാവണമെന്നു എല്ലാവരോടും അഭ്യര്‍ത്ഥിക്കുന്നു.

ഇതിന്റെ സംഘാടക സുഹൃത്തുക്കൾക്ക്, ഗിരീഷ്‌, ആന്റണി, ദിലീപ്, സജിരാജ്, കാപ്പാസ് മുഹമ്മദ്കോയ, തുടങ്ങിയവര്‍ക്കും പന്തലിലെത്തിയ എല്ലാ സുഹൃത്തുക്കള്‍ക്കും അഭിനന്ദനങ്ങളും ആശംസകളും നേരുന്നു.

ടി. കെ. ഉണ്ണി
൧൮-൦൧-൨൦൧൪